सरकारको मौनताप्रति माओवादीको आपत्ती

भारतीय पक्षले नेपाली भूमि मिच्दा र नेपाली जनतालाई दुःख दिँदासमेत सरकार मौन बसेको भन्दै एकीकृत नेकपा माओवादीले आपत्ती जनाएको छ ।काठमाडौको कोटेश्वरस्थित पार्टी केन्द्रीय कार्यालय पेरिसडाँडामा बसेको स्थायी समितिको तेस्रो दिनको बैठकमा माओवादी नेताहरुले सरकारको मौनताप्रति आपत्ती जनाएका हुन् ।

आन्दोलन भारतीय जनता विरोधी नभइ भारतीय शासक वर्गको हेपाहा प्रवृति र विस्तारवादी नीतिविरुद्ध केन्द्रीत गर्नुपर्नेमा माओवादी नेताहरुले जोड दिएका छन् । उनीहरुले आफ्नो आन्दोलनले भारतीय जनताको भावनामा आघात पुग्नसक्नेमा सचेत हुन नेतृत्वलाई सुझाव पनि दिएका छन् । आजको बैठकमा नेता देव गुरुङ र वर्षमान पुन ‘अनन्त’ले आफ्नो धारणा राख्नुभएको थियो ।

बैठकपछि पार्टी प्रबक्ता दिनानाथ शर्माले राष्ट्रिय स्वाधीनता र नागरीक सर्बोच्चताको आन्दोलन आगामी विस्तारीत बैठक लगायत विषयमा छलफल भएको बताउनु भयो । बैठक भोली विहानसम्मका लागि स्थगित भएको छ ।