मेघालयमा तीन नेपालीभाषीको हत्या

काँकडभिट्टा ४ जेठ ।  अल्पसंख्यक नेपालीभाषी र बहुसंख्यक खासीबीचको तनावपछि भारतको मेघालयमा तीन नेपालीभाषीको हत्या भएको छ । मेघालय गोर्खा वेल्फेयर सेन्टरका सदस्य टीआर जोशीले दिएको जानकारी अनुसार मारिनेमा मेघालयको वडापानी भन्ने स्थानका ७० वर्षीय धनपति बास्तोलासहित तीन जना रहेका छन् । सोमबार भएको घटनामा मृतक अन्य दुईको नाम खुल्न सकेको छैन ।

तीनै जनाको खासीहरुले गरेको कुटपिटपछि मृत्यु भएको बताइएको छ । जोशीका अनुसार कोइलाखानीमा काम गर्न पुगेका नेपालीभाषीलाई कुटपिट गरेर खासीहरुले मेघालय छाड्न चेतावनी दिएका छन् । पूर्वोत्तर भारतको मेघालय र आसामको सीमामा पर्ने लांगपीमा गत आइतवार नेपालीभाषी र रैथाने खासी समुदायवीच ´डप भएको थियो । सो क्रममा प्रहरीको गोली लागेर ७ जना खासी समुदायका व्यक्तिको मृत्यु भएको थियो ।