मकै कृषकद्वारा विराटनगरमा प्रदर्शन

विराटनगर २९ चैत्र । मोरङको इटहराका मकै कृषकहरुले मकैको घोगामा दाना नलागेपछि क्षतिपुर्तीको माग गर्दै आइतबार विराटनगरका प्रदर्शन गरेका छन् । इटहरा गाविसको ८ सय ५० बिघाहा क्षेत्रफलमा लगाएको मकैमा दाना नलागेपछि हरिया मकैका बोटसहितका कृषकहरुले प्रदर्शन गरेका हुन् । मकैखेति गरेका कृषकहरुले गठन गरेको संघर्ष समितिको नेतृत्वमा आएका कृषकहरुले क्षतिपूर्तीको माग गर्दै अर्थमन्त्री सुरेन्द्र पाण्डेलाई ज्ञापनपत्र समेत बुझाएका छन् ।

भारतबाट आयात गरिएको हाइबि्रड जातको मकैको बीउ रोपेकोमा दाना नलागेपछि कृषकहरु आन्दोलित भएका हुन् । प्रोएग्रो पाइनीयर श्रीराम सिडटेक मंसुण्डो शुभम् आदी कम्पनीले उत्पादन गरेको मकैमा दाना नलागेको कृषक समुहले अर्थमन्त्रीसमक्ष पेश गरेको ज्ञापनपत्रमा उल्लेख छ । कृषकहरुले गएको कात्तिक १५ देखि मंसिर २५ गतेसम्म रोपेको मकैमा दाना नलागेको बताएका छन् ।

कृषकहरुले आम्दानीको मुख्य खेती डुबेको भन्दै सरकारले क्षतिपुर्ती दिनुपर्ने माग गरेका हुन् । उनीहरुले कृषिमा प्रयोग भएको मकैको बीउ मजदुरी रासायनीक मल तथा िसंचाई वापतको खर्च र क्षतिपुर्ती सरकारले उपलव्ध गराउनु पर्ने माग गरेका छन् ।

ज्ञापनपत्र बुझाउदै कृषकहरुले माग पुरा नगरे चरणवद्ध आन्दोलनमा उत्रने चेतावनी दिएका छन् । यस अघि आइतबार नै उनीहरुले प्रमुख जिल्ला अधिकारीमार्फत प्रधानमन्त्री समक्ष ज्ञापनपत्र बुझाएका थिए ।

बाराका कृषकहरुले आन्दोलन गरेपछि सरकारले उनीहरुलाई ३० करोड क्षतिपुर्ती उपलव्ध गराउने निर्णय गरेपछि मोरङका पीडित कृषकहरु आन्दोलनमा उत्रिएका हुन् ।